Losing Memory
如果有一日, 你突然記唔起你每日都會入一次嘅e-mail password係咩嘅時候, 你會點?
今日, 我就遇到呢個問題.
平時諗都唔洗諗就可以打個password出嚟, 今日, 竟然定咗格, 一個字都諗唔起. 唔係講笑, 我連個password starts with 咩都完全無印象! 夜晚同媽咪傾電話講起呢樣野, 佢講咗句: ‘唔係呀嘛, 你唔係有老人痴呆呀嘛?’ 雖然即場就’啋’我媽咪, 講真, 我真係有啲驚. 尢其是近來發現我唔記得野嘅情況越嚟越嚴重, 行去一個地方諗住要辦啲事, 去到又完全記唔起去嗰度做咩; 睇書越嚟越入唔到腦, 讀完3分鐘後就煙消雲散, 連永遠一睇就唔會忘記嘅漫畫都開始無印象; 今日竟然連日日都會input一次嘅password都可以記唔起...
天呀, 搞咩呀我個腦?!
電話中媽咪又再嚇我:’你以前記性好好架噃, 睇一次就記得, 你讀書以嚟我都未見過你背過書, 你依家咁早就退化? 老喇你!!’
呀, 媽咪唔講我唔醒起, 以前我真係唔洗背書, 考試測驗前一定係前一日先開始睇書, 因為一定記得; 仲記得細個玩過一個遊戲, 就係要喺行三十步以內背好一篇文, 以前真係未輸過; 依家, 唔好話背, 我連集中精神睇嘅能力都已經衰退...咁, 我仲可以讀書嘛?! 唉哎, 我仲想讀書架, 唔好玩我, 我仲有好多野要學, 仲有好多野要記架!
好老實咁講, 如果我真係有老人痴呆, 又如果我真係好快會唔記得所有野, 我希望, 至起碼, 我仲記得我屋企人, 男友同朋友, 免得佢哋傷心.
唉, 我係咪要check一check個腦?
Daily random photo:
by Konica C35 AF2 using Mitsubishi 200 film 攝於香港
- 用另一種film 於 C35 上, 顏色出嚟靚好多, Mitsubishi film好似將色彩淡化咗咁, 我唔鍾意, 但係平囉. 仲有好多筒, 去旅行時要拎幾筒去燒吓佢先得.
Nice Shot
! it’s impressive 
Comment by Gi — April 25, 2006 @ 3:40 pm